पालकमंत्र्याची नियुक्ती करा

पालकमंत्र्याची नियुक्ती करा

विरोधी पक्षनेते अंबादास दानवे यांची सरकारकडे मागणी

छत्रपती संभाजीनगर : माजी आमदार संदिपान भुमरे यांची लोकसभा सदस्य म्हणून निवड झाली असल्याने विधानसभा सदस्यत्वाचा त्यांनी राजीनामा दिला आहे. त्यामुळे संभाजीनगर जिल्ह्याचे पालकमंत्री पद मागील बऱ्यांच दिवसांपासून रिक्त असल्याने तातडीने जिल्ह्यासाठी पालकमंत्र्याची नियुक्ती करा, अशी मागणी शिवसेना नेते तथा विरोधी पक्षनेते अंबादास दानवे यांनी राज्याच्या मुख्यमंत्र्यांकडे पत्राद्वारे केली आहे.

जिल्ह्याचे पालकमंत्री पद रिक्त झालेले असल्याने जिल्हा नियोजन विकास समितीची बैठक आजतागायत होवू शकलेली नाही. तसेच पालकमंत्री पद रिक्त असल्याने जिल्ह्याचे नियोजन पूर्णत: ठप्प झाले आहे. संभाजीनगर जिल्ह्याला विविध विकास कामांसाठी प्राप्त झालेला निधी पालकमंत्री नसल्याने अखर्चित राहण्याची शक्यता निर्माण झाली आहे. त्यामुळे शहराच्या व जिल्ह्याच्या विकासावर त्याचा विपरित परीणाम होणार आहे. तसेच आगामी काळात राज्याच्या विधानसभा निवडणुकीसाठी आचारसंहिता लागू होणार असल्याने तात्काळ नियुक्ती करणे आवश्यक असल्याची सूचना दानवे यांनी केली.

आचारसंहितेपूर्वी नियुक्ती आवश्यक

छत्रपती संभाजीनगर ही महाराष्ट्राच्या पर्यटनाची राजधानी मानली जाते. मात्र तरी देखील सध्या जिल्ह्याला पालकमंत्री नाही. जिल्ह्यासाठी पालकमंत्र्यांची तातडीने नियुक्ती करुन संभाजीनगर जिल्ह्याला योग्य न्याय देण्याची विनंती अंबादास दानवे यांनी केली आहे. आगामी काळात होणाऱ्यां विधानसभा निवडणुकीच्या पार्श्वभूमीवर आचार संहिता लागू होऊ शकते. त्यामुळे आचारसंहिता लागण्यापूर्वी पालकमंत्र्यांची नियुक्ती होणे आवश्यक आहे.