आत्महत्याग्रस्त शेतकऱ्यांच्या कुटुंबियांपर्यंत योजनांचा लाभ पोहोचवा

आत्महत्याग्रस्त शेतकऱ्यांच्या कुटुंबियांपर्यंत योजनांचा लाभ पोहोचवा

-वसंतराव नाईक शेती स्वावलंबन मिशनचे अध्यक्ष निलेश हेलोंडे-पाटील यांचे निर्देश

छत्रपती संभाजीनगर : आत्महत्याग्रस्त शेतकऱ्यांच्या कुटुंबियांना आधार देऊन त्यांच्या उत्कर्ष आणि उन्नतीसाठी विविध योजनांचा लाभ त्यांच्यापर्यंत संबंधित विभागातील यंत्रणांनी पोहोचवावा, असे निर्देश वसंतराव नाईक शेती स्वावलंबन मिशनचे अध्यक्ष निलेश हेलोंडे-पाटील यांनी केले. यामुळे आत्महत्याग्रस्त शेतकºयांच्या कुटुंबियांना थोडासा आधार मिळणार आहे.
वसंतराव नाईक शेती स्वावलंबन मिशनअंतर्गत गुरूवार रोजी जिल्हाधिकारी कार्यालयात बैठकीचे आयोजन करण्यात आले. यावेळी उपायुक्त (रोहयो) डॉ. अनंत गव्हाणे, अपर जिल्हाधिकारी डॉ. अरविंद लोखंडे, कृषी उपसंचालक तुकाराम मोटे पशुसंवर्धन विभागाच्या हेमा बनसोडे, जिल्हा उपनिबंधक सहकारी संस्था मुकेश बारहाते, एमआयडीसीचे प्रादेशिक व्यवस्थापक अशोक रसाळ, सहाय्यक वनसंरक्षक दादासाहेब तौर,सहाय्यक संचालक आरोग्य विभागाचे डॉ. जितेंद्र डोंगरे, शिक्षण विस्तार अधिकारी शिरसाट तसेच कौशल्य विकास विभागाचे अधिकारी या बैठकीस उपस्थित होते.

आत्महत्याग्रस्त शेतकऱ्यांच्या कुटुंबीयांना मदत करुन त्यांना आरोग्य, शिक्षण, कृषी, पशुसंवर्धन अशा विविध विभागांच्या योजनांचा लाभ पोहोचवून त्यांना मुख्यप्रवाहात आणणे हा मुख्य उद्देश वसंतराव नाईक शेती स्वावलंबन मिशनचा आहे. यासाठी इयत्ता नववी आणि दहावीत शिक्षण घेणाऱ्या मुला-मुलींसाठी शैक्षणिक साहित्य, पाठ्यपुस्तके विनामूल्य उपलब्ध करून देण्याबाबत जिल्हा परिषद अंतर्गत विविध सामाजिक संस्था संस्था आणि उद्योगांकडील सामाजिक उत्तरदायित्व निधी अंतर्गत मदत उपलब्ध करून द्यावी. तसेच आरोग्य विभागा अंतर्गत प्रेरणा प्रकल्पामधून त्यांच्या आरोग्य तपासणीबाबत शिबिर आयोजित करावे असे निर्देश लोंढे पाटील यांनी दिले.

यावेळी लोंढे पाटील म्हणाले की, मराठवाड्यात गायरान जमिनीच्या रेकॉर्ड संदर्भात महसूल विभागाने तयार केलेल्या जमिन बँकेचे सहाय्य पशुसंवर्धन विभागाने घेऊन शासकीय गावरान जमिनीवर चारा लागवडीचे नियोजन १० दिवसांच्या आत करून शेतकऱ्यांच्या जनावरांसाठी चारा उपलब्ध करून देण्याचे नियोजन करण्याचे निर्देश पशुसंवर्धन विभागाला दिले.

रोजगार प्रशिक्षणाची माहिती द्या
याचप्रमाणे विद्यार्थ्यांची आरोग्य तपासणी राष्ट्रीय बालस्वास्थ्य कार्यक्रम अंतर्गत करण्यात यावी. कौशल्य विकास अंतर्गत ग्रामीण भागातील युवकांसाठी रोजगार प्रशिक्षण देण्याच्या विविध योजनांची माहिती ग्रामपंचायतच्या माध्यमातून देण्यात यावी, असेही लोंढे म्हणाले.